E letschti Hampfle Schnitzelbängg
Aktualisiert

E letschti Hampfle Schnitzelbängg

Fasnacht-Sprüch us Basel

«H20 stoot fir Wasser – GC stoot fir nit, H5N1 fir d Voogelgrippe, die stresst e huffe Lyt. Mit däm Begriff wird au d Regierig z Baasel guet ergläärt. Miir hänn 5, und laider isch nit aine ebbis wäärt.» Tam Tam

«Dr Pfarrer Sabo z Röschenz isch katholisch voll derby! Dr Koch sait: ‹Vom Verhalte här kennt är e Kampfhund sy. Wäg ihm fahrt scho s ganz Baselbiet jetz 80›, rieft är muff. Dä wirblet nämmlig mit sym Puff, dr ganzi kirchlig Fyynstaub uff.» d Striggede

«In der Sunntigs-Schuel, do wird ufs mol, dr Pfarrer grausam muff. Dr Hansli stoht ufs Pult und macht si Hooselade uff. Dä bliibt jetzt als am Sunntig offe und zwor sperrangelwyt. Ych halt mi konsequänt nach Gsetz, an d Laadeeffnigszyt.» d Joggeli

«‹Hesch gwüsst dass sy dye neuje Buesse grad kassiere?› sait my Frau. Dye duet my total irritiere. Sy sait: ‹Wenn noochhär uss dr Baiz kunnsch, heschs begriffe no kunnts saudüür wenn wiider duesch an Egge schiffe.›» dr Schoorsch

«Dr Pfaarer Sabo kämpft mit Häärzbluet geege s Zölibat am letschte Närv vom Bischof Koch är ganz versässe nagt. D Abschaffig wäri guet und rächt, doch wyrds uns mächtig steere wenn eine wie dr Bischof Koch sich au no kennt vermehre.» Rätschbääse

«Dr Fiinstaub bringt Tämpo 80 uff de Autobaane. E mänge fluecht, jä gopfridstutz, do kunsch jo niene aane. Wärbewirggsam git s Plakaat – druff sait e bekannts Modäll. Miir Schifaarer bloche syt mängem Joor numme halb so schnäll.» Tam Tam

«S Hildy, das vo Hölschte, schreyt: ‹He nai – ych glaub ych spinn. Du Max was machsch du mit de Hüehner i mym Büro drinn?› – ‹Uff Vire prüefe wott y se, die grosse und die chlyne, nur göh die chaibe Vycher nit ins PC- Laufwärk yne.›» Schnabelwetzer

«Mer hänn zwor z Ischtambul verloore aber kämpfd hän mer wie Gladiatore!

Und worom die beide Yakin nid derbyy sin – wais y jetzt: Die hänn sich doch –

us luter Schiss – dehaime scho verletzt.» Peperoni

«Wohär kuunt s Kopfduech bi däm Von Rohr? S het ys interessiert. Won är e

Buschi gsih isch, syg das im Spital bassiert. Si haigen ihn falsch gwigglet und sy Gsicht verwäggslet no. Schiins syg domols im Kreissaal scho, zem Muul nur Schyssdrägg uusekoo!» d Striggede

«D Tamara Wernli goht uff Bsuech uff Rieche uuse, zue däm, wo us Brodäscht im Baum duet nordisch pfuuse. Dä froggt, wo sii so gschwind der Baum duet uffe gramsle: ‹Jä sinn jetzt Sii e sone gschützti Wasseramsle?›» d Zahnstocher

Deine Meinung